頭擺頭擺，天吂光个時節
遠遠聽着古董伯歕个螺聲響起
阿姆渡𠊎來到木麻黃下个海脣
百來儕大人細子排做兩排
拚力來拉，一聲聲嘿咻嘿咻
罟網頂高嗶嗶跳个魚仔
係早年笨子港歸庄人家个想望
頭擺頭擺，小學避暑个時節
日頭花煮滾滾个海沙埔
幾千隻沙馬仔撞東又撞西
拚命去追，逐過來逐過去
竹蔞仔肚爬爬蹶蹶个海毛蟹
係當晝頭阿爸飯桌頂个豐沛
頭擺頭擺，流水退去个時節
鵝卵石密密係个海沙灘
海風唅等海蚵仔臭臊个味緒
煞猛來刺，一刀又一刀
大碗公裡背漸漸淰起來个「青蚵仔」
係暗晡夜一家人碗肚个萋湯
一𥍉目四五十年過去咧
蚵仔無咧，沙馬少咧，牽罟船廢忒咧
就看着，外地人沙馬多个腳跡橫打直過
隔壁莊出烏煙个大煙囪緊來緊多⋯⋯