摘一片夕陽
貼踮普陀寺的飛簷
四分之一世紀進前的記憶之盒
齊光起來
觀世音菩薩慈眉釣起塵封的往事
擱底的童年
開始輕輕仔咧划船

風吹過十二月的甘蔗園
我的童年曝佇蔗葉
曝佇牛車
曝佇火車

風吹過九月的稻埕
我的鄉愁鑲黃金
鑲南風
鑲日頭

假使童年會當慢慢仔哺
一定是甜甜芳芳
我咬過的西瓜
猶倒佇溪埔咧睏
我划過的竹棑仔
猶佇曾文溪等我出帆
我的跤跡一直晾佇蘆筍園
毋甘轉來
聽講大箍福仔咧做大頭家
矮仔勝咧起大樓
愛哭英仔咧做幼稚園的園長

故鄉是一矸用鄉愁寬寬仔激出來的酒
逐喙都予你
醉茫茫